Canolfan wefru cerbydau trydan (EV) fwyaf Cymru yn agor ar dir Llyfrgell Genedlaethol Cymru

21 Tachwedd 2023

Mae gan bobl leol, ymwelwyr a staff y llyfrgell yn Aberystwyth bellach fynediad i safle gwefru cerbydau trydan mwyaf Cymru diolch i hwb newydd gyda 40 o bwyntiau gwefru – gan gynnwys deg pwynt gwefru cyflym Tritium 75kW DC – ar dir Llyfrgell Genedlaethol Cymru.

• Bydd safle gwefru cerbydau trydan newydd yn Aberystwyth – y mwyaf yng Nghymru hyd yma – yn galluogi hyd at 40 o gerbydau i wefru ar yr un pryd.
• Mae’r safle manwerthu sydd wedi’i leoli yn Llyfrgell Genedlaethol Cymru yn dod â chapasiti gwefru y mae mawr ei angen i ganolbarth Cymru wrth i’r genedl anelu at 4,000 o wefrwyr cerbydau trydan erbyn 2030.
• Mae'n cynnwys wyth cysylltydd cyflym (DC) ar gyfer mynediad cyhoeddus a dau gysylltydd cyflym (DC) ar gyfer mynediad staff, gan alluogi gwefru o 20% - 80% o fewn cyfnod  gwefru 40 munud.

Tra bo’ch car yn gwefru gallwch:

• gymryd cip sydyn ar y casgliadau yn arddangosfeydd y Llyfrgell, gan gynnwys Deiseb Heddwch Menywod Cymru 1923;
• edrych ar glipiau teledu hanesyddol yng Nghanolfan Archif Ddarlledu Cymru;
• gael paned o de neu goffi a chacen ffres yng Nghaffi Pen Dinas;
• brynu anrhegion a chardiau Nadolig yn yn siop.

Bydd y ganolfan wefru o fudd i berchnogion cerbydau trydan lleol, gan gynnwys cwsmeriaid o drefi a phentrefi cyfagos, yn ogystal â denu twristiaid sydd naill ai’n ymweld ag Aberystwyth neu basio trwy’r dref. Bydd y datblygiad hwn yn galluogi gyrwyr cerbydau trydan i ymweld â’r siop a’r Llyfrgell wrth iddynt aros i’w cerbyd trydan gwblhau cylch gwefru, a fydd yn ei dro yn cynyddu ymwelwyr trwy ddrysau’r Llyfrgell i gefnogi’r sefydliad.

Dywedodd Pedr ap Llwyd, Llyfrgellydd a Phrif Weithredwr, Llyfrgell Genedlaethol Cymru:

“Mae hwn yn gam mawr ymlaen yn ein harlwy i ymwelwyr ac wrth gyflawni ein nodau llesiant a nodir yn ein Cynllun Strategol sydd yn cydfynd â Deddf Llesiant Cenhedlaethau’r Dyfodol. Rydym yn falch o fod wedi gweithio gyda Tritium i sicrhau’r cyfleuster EV mwyaf yng Nghymru hyd yma a byddwn yn croesawu pawb sy’n dymuno defnyddio’r cyfleusterau gwefru yn ogystal â defnyddio’r amser hwnnw i ymweld â’n harddangosfeydd, caffi, a siop.”

Dywedodd Jane Hunter, Prif Swyddog Gweithredol, Tritium:

“Er bod Llywodraeth y DU bellach wedi cadarnhau cynlluniau i wahardd gwerthu cerbydau petrol a disel newydd erbyn 2035, rhaid i’r broses o gyflwyno seilwaith gwefru cerbydau trydan barhau i gyflymu er mwyn cyrraedd eu targed i osod 300,000 o orsafoedd gwefru cyhoeddus erbyn 2030. Mae gan Gymru ran fawr i’w chwarae yn y cyflymiad hwn fel bod holl rwydwaith trafnidiaeth y DU yn cael ei drydaneiddio, gan ganiatáu i yrwyr groesi’r wlad.”

“Mae ein gosodiad diweddaraf yn Llyfrgell Genedlaethol Cymru yn dod â gwefrwyr cyflym y mae mawr eu hangen i Gymru, ac mae Tritium yn falch o fod yn rhan o ddatrysiad sy’n annog teithio cynaliadwy a chyfleoedd gwefru ar y tirnod cenedlaethol hwn yn Aberystwyth.”

 

Diwedd

** This press release is also available in English **

Cyswllt Cyfryngau Llyfrgell Genedlaethol Cymru

Rhodri ap Dyfrig, Pennaeth Marchnata a Chynulleidfaoedd, 

rhodri.apdyfrig@llyfrgell.cymru / 07521761762

 

Cyswllt Cyfryngau Tritium

Jack Ulrich

media@tritiumcharging.com

 

Cyswllt Buddsoddwyr Tritium

Cary Segall

ir@tritiumcharging.com

 

NODIADAU AR GYFER GOLYGYDDION

Am Tritium

Wedi'i sefydlu yn 2001, mae Tritium (DCFC) yn dylunio ac yn cynhyrchu caledwedd a meddalwedd perchnogol i greu gwefrwyr cyflym DC dibynadwy ar gyfer cerbydau trydan. Mae gwefrwyr a chadarn Tritium wedi'u cynllunio i edrych yn wych ar y stryd fawr a ffynnu mewn amodau garw. Cyflawnir hyn trwy dechnoleg sydd wedi'i pheiriannu i fod yn hawdd i'w gosod, eu perchnogi a'u defnyddio. Mae Tritium yn canolbwyntio ar arloesi parhaus i gefnogi ein cwsmeriaid ledled y byd.

Am ragor o wybodaeth, ewch i tritiumcharging.com

Am Lyfrgell Genedlaethol Cymru

Manylion llawn a ffioedd gwefru EV ar leoliad yLlyfrgell:

https://www.llyfrgell.cymru/ymweld/cyn-ymweld/sut-i-gyrraedd-llgc/peiriannau-gwefru-cerbydau-trydan 

Mae Llyfrgell Genedlaethol Cymru yn Llyfrgell i Gymru a’r byd. Wedi ei lleoli yn Aberystwyth, mae’n gartref i stori Cymru.

Wedi ei hagor yn 1907, mae’r Llyfrgell yn ganolbwynt ymchwil i ddiwylliant a threftadaeth Cymru a’r gwledydd Celtaidd.

Pwrpas y Llyfrgell yw gwneud ein diwylliant a'n treftadaeth yn hygyrch i bawb allu dysgu, ymchwilio a mwynhau.

Rydym yn llyfrgell adnau cyfreithiol, sy'n golygu fod gennym hawl i gopi o bob cyhoeddiad print ym Mhrydain ac Iwerddon, ond mae ein casgliadau hefyd yn cynnwys y canlynol

• 7,000,000 troedfedd o ffilm
• 250,000 awr o fideo
• 7,000,000 o lyfrau a phapurau newydd
• 40,000 llawysgrif
• 1,500,000 map
• 150,000 awr o sain
• 950,000 ffotograff
• 60,000 gwaith celf
• 1,900 metr ciwb o archifau

Cewch wybodaeth bellach ynghyd â rhestr o adnoddau ar: https://www.llyfrgell.cymru/catalogau-chwilio/catalogau/catalogau-arbenigol