Dathlu artistiaid Sir Benfro mewn arddangosfa newydd

09.05.2023

Mae arddangosfa gelf newydd wedi agor yn Oriel Glan-yr-afon, Hwlffordd sy’n dathlu artistiaid Sir Benfro, a’r ffyrdd mae ei thirwedd, pobl a golau wedi eu hysbrydoli.

Mae arddangosfa Artistiaid Sir Benfro yn cynnwys gweithiau gan artistiaid o ddechrau’r ugeinfed ganrif fel Gwen ac Augustus John ac artistiaid mwy cyfoes fel David Tress a Claudia Williams. Ynddi, mae’n dwyn ynghyd casgliad arbennig o weithiau gan arlunwyr lleol, neu rai sydd â chysylltiadau â’r sir hardd hon.

Trefnir y darluniau mewn tri phrif thema - morluniau ac arfordiroedd, lleoliadau trefol a phortreadau. Daeth yr eitemau i gyd o gasgliad gweithiau ar bapur Llyfrgell Genedlaethol Cymru.

Gyda’i hansawdd golau arbennig a thirwedd hardd, mae Sir Benfro wedi bod yn ganolbwynt creadigol sy’n denu ac yn ysbrydoli artistiaid o bob rhan o’r DU a thu hwnt ers amser maith ac mae’r berthynas agos rhwng celf a thirwedd yn Sir Benfro a chael ei harchwilio yn yr arddangosfa arbennig yma.

Meddai Rhian Gibson, Cyfarwyddwr Cyfathrebu, Ymgysylltu a Phartneriaethau Llyfrgell Genedlaethol Cymru:

"Rydym yn falch iawn o’n cyswllt gydag Oriel Glan-yr-afon.  Mae cael y cyfle i rannu y gweithiau celf hyn o’n casgliadau gyda phobl Sir Benfro a’i hymwelwyr yn rhan bwysig o’n strategaeth i roi mynediad eang i’n casgliadau a chreu cynulleidfaoedd newydd i gelf Cymru. Mae atyniad ac ysbrydoliaeth sir Benfro i artistiaid o bell ac agos i'w gweld yn amlwg yn yr arddangosfa hon, a gobeithiaf y bydd yn ysbrydoli ymwelwyr i edrych o'r newydd ar y sir o'u cwmpas."

Meddai Mari Elin Jones, Swyddog Dehongli Llyfrgell Genedlaethol Cymru:

"Gyda sir Benfro wedi cael ei disgrifio fel 'St Ives Cymru' rwy'n hynod falch o'r cyfle i ddangos gweithiau rhai o artistiaid enwocaf y sir o gasgliadau gweithiau ar bapur Llyfrgell Genedlaethol Cymru, yn Hwlffordd.  Mae hwn yn gyfle unigryw i ni rannu casgliad nad yw’n cael sylw yn aml mewn arddangosfa sydd wedi’i churadu yn arbennig ar gyfer Oriel Glan-yr-afon. Rydyn ni’n gobeithio bydd yr arddangosfa hon yn atynnu ymwelyr i’r Oriel ac yn cael ei fwynhau gan nifer."

Ochr yn ochr ag arddangosfa Artistiaid Sir Benfro, cynhelir arddangosfa Sir Benfro: Ddoe A Heddiw, sef arddangosfa barhaol sy’n canolbwyntio ar hanes, diwylliant, a thirlun Sir Benfro. Bydd y ddwy arddangosfa ar agor tan Ddydd Sadwrn, 3 Medi 2023.

--DIWEDD--

**This press release is also available in English**

Am fwy o wybodaeth a lluniau, cysylltwch â: Rhodri ap Dyfrig, Pennaeth Marchnata a Chynulleidfaoedd, Llyfrgell Genedlaethol Cymru: rhodri.apdyfrig@llyfrgell.cymru / 07855 362206

NODIADAU I OLYGYDDION

Am Oriel Glan-yr-afon, Hwlffordd

Mae Glan-yr-afon yn ganolfan ddiwylliannol flaenllaw yng nghalon Hwlffordd, sir Benfro. Fe’i hagorwyd ym mis Rhagfyr 2018, ac mae’n cynnwys llyfrgell fodern, canolfan i ymwelwyr, siop goffi a gofod ar gyfer oriel sy’n arddangos casgliadau o Lyfrgell Genedlaethol Cymru. Mae’r cyfleuster gwych hwn yn anarferol ac yn arloesol, ac eisoes wedi bod yn rhan allweddol o’r gwaith o adfywio’r dref a’r ardal ehangach yn sir Benfro.

Am fwy o wybodaeth, ewch i:

• wefan Glan-yr-afon
• dudalen Facebook Llyfrgelloedd Sir Benfro, neu
• ffoniwch Glan-yr-afon ar 01437 775244

Am Lyfrgell Genedlaethol Cymru

Mae Llyfrgell Genedlaethol Cymru yn un o lyfrgelloedd mawr y byd. Wedi ei lleoli yn Aberystwyth, mae’n gartref i stori Cymru.

Wedi ei hagor yn 1907, mae’r Llyfrgell yn ganolbwynt ymchwil i ddiwylliant a threftadaeth Cymru a’r gwledydd Celtaidd.

Pwrpas y Llyfrgell yw gwneud ein diwylliant a'n treftadaeth yn hygyrch i bawb allu dysgu, ymchwilio a mwynhau.

Rydym yn llyfrgell adnau cyfreithiol, sy'n golygu fod gennym hawl i gopi o bob cyhoeddiad print ym Mhrydain ac Iwerddon, ond mae ein casgliadau hefyd yn cynnwys y canlynol

• 7,000,000 troedfedd o ffilm
• 250,000 awr o fideo
• 6,000,000 o lyfrau a phapurau newydd
• 40,000 llawysgrif
• 1,500,000 map
• 150,000 awr o sain
• 950,000 ffotograff
• 60,000 gwaith celf
• 1,900 metr ciwb o archifau

Gallwch chwilio'r casgliadau ar-lein a chewch wybodaeth bellach ynghyd â rhestr o adnoddau ar ein gwefan.