“Mae Gareth Bale yn berson arbennig iawn. Mae’n debyg mai fo yw’r chwaraewr gorau a mwyaf dylanwadol erioed i wisgo crys coch Cymru. Yr oll mae o angen yw’r ddraig ar ei frest. Fe wireddodd o ein breuddwydion ni fel cenedl a bydd ein dyled ni iddo yn enfawr am bopeth a wnaeth drosom ni yng Nghymru. Dyma fo’n sefyll cyn sgorio ein gôl agoriadol yn yr Ewros, a phwy well i sgorio’r gôl honno?”
Owain Fôn Williams
Enw llawn: Gareth Frank Bale
Dyddiad geni: 16 Gorffennaf 1989
Man geni: Caerdydd, Cymru
Taldra: 1.86m
Safle: Asgellwr
Clybiau pêl-droed: Southampton, Tottenham Hotspur, Real Madrid, Los Angeles FC
Nifer o gapiau dros dîm cyntaf Cymru: 111
Nifer o goliau i Gymru: 41
| Mynychodd Gareth Bale Ysgol Gynradd yr Eglwys Newydd ac Ysgol Uwchradd Whitchurch High yng Nghaerdydd. |
| Tra yn yr ysgol uwchradd, roedd Gareth Bale wrth ei fodd â chwaraeon o bob math, nid yn unig pêl-droed. Roedd yn chwaraewr rygbi a hoci heb ei ail ac yn athletwr penigamp, a phan oedd yn 14 oed llwyddodd i redeg 100 metr mewn 11.4 eiliad. |
| Ar 17 Ebrill 2006, pan oedd yn 16 mlwydd a 275 diwrnod oed, Gareth Bale oedd yr ail chwaraewr ieuengaf erioed i chwarae pêl- droed dros dîm cyntaf Southampton. |
| Chwaraeodd Gareth Bale ei gêm gyntaf dros dîm pêl-droed Cymru ar 27 Mai 2006, pan oedd yn 16 mlwydd a 315 diwrnod oed; y person ieuengaf i wneud hynny ar y pryd. |
| Chwaraeodd Gareth Bale i glwb Real Madrid am naw mlynedd rhwng 2013 a 2022. Yn ystod y cyfnod hwnnw, enillodd Real Madrid nifer o wobrau mawr, yn cynnwys tri theitl La Liga a phum teitl Cynghrair y Pencampwyr. |
| Enillodd Gareth Bale 111 cap dros dîm pêl-droed Cymru gan sgorio 41 gôl. Ef yw’r chwaraewr sydd wedi chwarae’r mwyaf o gemau a sgorio’r mwyaf o goliau dros Gymru erioed. |
| Gareth Bale oedd capten tîm pêl-droed Cymru yn ystod pencampwriaeth Cwpan y Byd FIFA yn Qatar yn 2022. Ef sgoriodd unig gôl Cymru yn y bencampwriaeth. |
| Ar 9 Ionawr 2023, ar ôl chwarae ei gêm olaf dros Gymru yn erbyn Lloegr ym mhencampwriaeth Cwpan y Byd FIFA 2022, cyhoeddodd Gareth Bale ei fod yn ymddeol o bêl-droed rhyngwladol. |
| Ers ymddeol o chwarae pêl-droed yn broffesiynol, mae Gareth Bale wedi bod wrth ei fodd yn chwarae golff. |
Eitemau sy'n berthnasol i hanes timau Pêl-droed Cymru
Porwch dewis o glipiau chwaraeon o Archif Ddarlledu Cymru
Dewch i ddarganfod mwy am Gymry enwog o’r gorffennol.