Dadorchuddio murlun newydd sy’n dathlu amrywiaeth Caerdydd

19.07.2024

Ddoe (18 Gorffennaf 2024) cafodd murlun newydd sbon ei ddadorchuddio yn Ysgol Uwchradd Cathays, Caerdydd.

Wedi’i ysbrydoli gan y gwaith The Wales Window gan yr artist John Petts, sy’n rhan o’r Casgliad Celf Cenedlaethol yn y Llyfrgell Genedlaethol, mae’r murlun yn dathlu amrywiaeth ardal Cathays.

Mewn gweithdai wedi’u cefnogi gan Brosiect Cymunedau Cymru, cafodd disgyblion Ysgol Uwchradd Cathays y cyfle i ddysgu am waith John Petts a’u cynefin, ac i ddefnyddio casgliadau’r Llyfrgell i ymchwilio hanes cymunedau amrywiol Caerdydd. Aethant ati wedyn i weithio gyda’r grwp o artistiaid UNIFY i gyd-gynllunio’r murlun arbennig yma.

Defnyddiodd UNIFY y syniadau hyn i ysbrydoli dyluniad terfynol y murlun trawiadol.

Meddai Rhodri Llwyd Morgan, Prif Weithredwr Llyfrgell Genedlaethol Cymru:
“Mae'n wych i weld y murlun arbennig hwn fel pen llanw prosiect rhagorol.  Mae gweithio gydag Ysgol Uwchradd Cathays a grwp artistiaid UNIFY wedi bod yn brofiad ardderchog ac rydym o hyd yn gyffrous pan mae cyfle i gymryd adnoddau unigryw y Llyfrgell Genedlaethol i mewn i'r gymuned i gydweithio ac i ysbrydoli dysgu a chreadigrwydd gyda'n gilydd.”

Mae prosiect Cymunedau Cymru gan Lyfrgell Genedlaethol Cymru yn cynnig cyfleoedd i bobl ifanc ddeall eu Cynefin eu hunain o fewn cyd-destun gwrth-hiliol trwy adrodd hanesion pobl o gefndiroedd amrywiol ar draws Cymru. Mae'r prosiect yn cynnwys datblygu deunyddiau dysgu i ddathlu amrywiaeth ac ymgysylltu gwrth-hiliol, gan helpu plant mewn ysgolion ledled Cymru i gofleidio a dathlu treftadaeth ddiwylliannol amrywiol.

--Diwedd--
** This press release is also available in English **

Cyswllt cyfryngau Llyfrgell Genedlaethol Cymru
Rhodri ap Dyfrig, Pennaeth Marchnata a Chynulleidfaoedd,  
rhodri.apdyfrig@llyfrgell.cymru / 07521 761762

Am Lyfrgell Genedlaethol Cymru
Mae Llyfrgell Genedlaethol Cymru yn Llyfrgell i Gymru a’r byd. Wedi ei lleoli yn Aberystwyth, mae’n gartref i stori Cymru.

Wedi ei hagor yn 1907, mae’r Llyfrgell yn ganolbwynt ymchwil i ddiwylliant a threftadaeth Cymru a’r gwledydd Celtaidd.

Pwrpas y Llyfrgell yw gwneud ein diwylliant a'n treftadaeth yn hygyrch i bawb allu dysgu, ymchwilio a mwynhau.

Rydym yn llyfrgell adnau cyfreithiol, sy'n golygu fod gennym hawl i gopi o bob cyhoeddiad print ym Mhrydain ac Iwerddon, ond mae ein casgliadau hefyd yn cynnwys y canlynol:

• 7,000,000 troedfedd o ffilm
• 250,000 awr o fideo
• 6,000,000 o lyfrau a phapurau newydd
• 40,000 llawysgrif
• 1,500,000 map
• 150,000 awr o sain
• 950,000 ffotograff
• 60,000 gwaith celf
• 1,900 metr ciwb o archifau

Gallwch chwilio'r casgliadau ar-lein. Cewch wybodaeth bellach ynghyd â rhestr o adnoddau ar ein gwefan.