Newidiadau i wasanaethau Llyfrgell Genedlaethol Cymru a threfniadau ar y safle yn Aberystwyth

21.10.21

Ar ddechrau mis Tachwedd bydd newidiadau i natur rhai o’r gwasanaethau o fewn adeilad y Llyfrgell yn Aberystwyth.  Mae iechyd a diogelwch ein hymwelwyr a’n staff yn flaenoriaeth i ni ac rydym yn parhau i fonitro’r risgiau sydd ynglwm â COVID-19 yn ofalus iawn. Fodd bynnag, mae’n hasesiad diweddaraf yn golygu ein bod mewn lle i addasu rhai o’n trefniadau.

Wrth ymweld â’r adeilad bydd y trefniadau canlynol yn dod i rym ar 1 Tachwedd 2021:

• Ni fydd angen trefnu o flaen llaw i ymweld ag adeilad y Llyfrgell.  Bydd mynediad agored i’r arddangosfeydd, Caffi Pendinas a’r Siop yn ogystal â’r Ystafell Ddarllen (gyda thocyn darllen dilys).
• Bydd yr adeilad ar agor rhwng 10.00 - 4.00 ddydd Llun i ddydd Gwener.  Bydd yr Ystafell Ddarllen ar gau rhwng 12.30 – 1.30.

Gwasanaeth Ystafell Ddarllen
Fel rhan o gynlluniau cyffrous ehangach i ddatblygu ein gofodau cyhoeddus bydd y gwasanaethau darllen presennol i gyd yn cael eu hadleoli’n barhaol yn Ystafell Ddarllen y Gogledd. Mae gwaith adnewyddu sylweddol ar Ystafell Ddarllen y Gogledd bellach wedi ei gwblhau ac mae addasiadau wedi eu gwneud i sicrhau ei fod yn ofod cyfforddus i weithio ynddo a chael mynediad i holl gasgliadau’r Llyfrgell.  Mae cynlluniau ar waith yn ystod y flwyddyn nesaf i ailddatblygu Ystafell Ddarllen y De er mwyn rhoi mynediad i’r Archif Ddarlledu Genedlaethol newydd ac fel ardal hyblyg ar gyfer gweithgareddau cyfranogi amrywiol.

Ni fydd angen archebu lle yn yr Ystafell Ddarllen wedi 1 Tachwedd, serch hynny rydym yn annog pawb i ragarchebu eitemau o’r casgliadau y byddant yn dymuno eu gweld cyn dod i’r Llyfrgell a hynny o leiaf 1 diwrnod ymlaen llaw os yn bosibl.

Meddai Dr Owain Rhys Roberts, Dirprwy Brif Weithredwr a Llyfrgellydd (Casgliadau ac Ymgysylltu):
“Mae’r deunaw mis diwethaf wedi bod yn gyfnod anodd ac heriol i bawb a thra ein bod ni’n parhau i gymryd gofal, rydym wedi’n cyffroi gan y cyfleon i ddatblygu ein gwasanaethau o fewn yr adeilad yn Aberystwyth.”

Mae manylion llawn am sut i ymweld â’r Llyfrgell i’w gweld ar ein gwefan.

--DIWEDD--

Gwybodaeth bellach:

Nia Wyn Dafydd

post(at)llgc.org.uk

**This press release is also available in English**