Amcanion Strategol LlGC

Amcan 1 - Cadw a datblygu cof y genedl

Yr amcan cyntaf sy’n greiddiol i’n cenhadaeth yw diogelu a chynyddu gwybodaeth am Gymru a’i phobl drwy gasglu a chaffael gwybodaeth gofnodedig sydd ar ffurfiau ysgrifenedig a chlyweledol. Yn benodol:

• Diogelu casgliadau drwy sicrhau eu bod yn derbyn gofal a gwaith cadwraethol o’r radd flaenaf, a hyrwyddo rhagoriaeth gan gynnal safonau rhyngwladol mewn perthynas â chadwraeth ffisegol a digidol.
• Ehangu a datblygu casgliadau archifau a chynnwys unigryw, gan feithrin yr arbenigedd i wella amrywedd y casgliadau ffisegol a digidol a’r modd o’u disgrifio.
• Cynnal y casgliadau cyhoeddedig cenedlaethol fel unig Lyfrgell Adnau Cyfreithiol Cymru, a gwella mynediad at y casgliad Adnau Cyfreithiol print a di-brint yn Aberystwyth a thu hwnt.

Amcan 3 - Cysylltu cymunedau

Un o amcanion craidd ein cenhadaeth yw cyrraedd ystod ehangach o gynulleidfaoedd ym mhob rhan o Gymru a thu hwnt a chyflawni hyn drwy raglenni ymgysylltu rhagweithiol sy’n hyrwyddo cynhwysiant, amrywedd a mynediad i’r Gymraeg a’i diwylliant. Yn benodol:

• Datblygu a chydgynhyrchu rhaglenni gydag ystod ehangach o gymunedau Cymru sy’n galluogi’r cymunedau hynny i elwa o’r casgliadau, ac yn caniatáu i’r Llyfrgell ddysgu a gwella o ganlyniad i’r ddeialog greadigol hon gyda chymunedau.
• Rhoi blaenoriaeth i’r lleisiau a’r profiadau byw sydd wedi eu tangynrychioli yng nghasgliadau a gweithgareddau’r Llyfrgell ac ymrwymo i Gymru wrth-hiliol.
• Ymgysylltu ymhellach drwy ddatblygu partneriaethau’r Llyfrgell gyda’r sectorau llyfrgelloedd ac archifau yng Nghymru, ein partneriaid Adnau Cyfreithiol, a’n partneriaid rhyngwladol yn y sectorau gwybodaeth a diwylliant.
• Creu cysylltiadau newydd y tu hwnt i Gymru gyda chymunedau a phartneriaid rhyngwladol a all elwa o gyfoeth y casgliadau am Gymru, a helpu i godi proffil Cymru a’i diwylliant.

Amcan 4 - Addysg, sgiliau ac ymchwil

Rydym am gyfoethogi sgiliau, ymchwil a phrofiadau dysgu pob dysgwr yng Nghymru. Yn benodol:

• Gweithio’n gydweithredol i ddatblygu adnoddau, sgiliau a phrofiadau sy’n cefnogi dysgwyr ac ysgolion i gwrdd ag anghenion y cwricwlwm newydd, gan gynnwys llythrennedd a llythrennedd gwybodaeth, a dealltwriaeth ddofn o ‘Cynefin’ a chyfoeth ac amrywiaeth diwylliannol y genedl.
• Datblygu adnoddau, arbenigedd a sgiliau sy’n cefnogi ymchwilwyr a dysgwyr gydol oes i gwrdd ag anghenion unigolion, grwpiau, a chyflogwyr mewn sectorau gwahanol o’r economi.
• Datblygu partneriaethau gyda cholegau, prifysgolion a sefydliadau eraill i gefnogi ymchwil ac arloesi drwy ddatblygu gwaith blaengar mewn data cysylltiedig, data mawr, deallusrwydd artiffisial, a’r dyniaethau digidol.

Blaenoriaethau Gweithredol

Mae’r adran hon yn crynhoi y prif flaenoriaethau gweithredol i roi cyfeiriad i benderfyniadau’n ymwneud ag adnoddau a buddsoddiadau. Caiff y blaenoriaethau hyn eu hadlewyrchu yn glir yn y Cynllun Gweithredol blynyddol.

Datblygu’r Casgliadau Cenedlaethol

• Byddwn yn rhoi blaenoriaeth i ehangu’r cynnwys unigryw sy’n adrodd straeon Cymru a’i phobl.
• Byddwn yn adolygu gwasanaethau’r Llyfrgell ar gyfer darllenwyr ac ymchwilwyr gyda’r nod o gynyddu mynediad a rhoi gwerth am arian.
• Byddwn yn gwella amrywedd a hygyrchedd ar draws y casgliadau gan roi’r lle blaenaf i anghenion a buddiannau defnyddwyr, yn enwedig lle maent wedi eu tangynrychioli yn ein gwaith.
• Byddwn yn datblygu cynlluniau hirdymor ar gyfer storio casgliadau, arbenigedd ym maes cadwraeth ac isadeiledd digidol gwydn.

Rhannu ac Ymgysylltu

• Byddwn yn cynyddu’r pwyslais ar hybu iechyd, llesiant, gwrth-hiliaeth a chyfiawnder cymdeithasol drwy ymgysylltu’n ehangach gyda chymunedau a chynulleidfaoedd.
• Byddwn yn datblygu platfformau blaengar ar gyfer casgliadau digidol er mwyn gwella’r profiad i ddefnyddwyr.
• Byddwn yn gwella profiad ymwelwyr – drwy ddatblygu adeilad y Llyfrgell i fod yn fwy hygyrch a chroesawgar, gyda rhaglenni gweithgareddau sydd ag apêl ehangach.
• Byddwn yn creu rhaglenni sgiliau ar y cyd â phartneriaid addysg ac addysg gydol oes i godi safonau llythrennedd gwybodaeth a llythrennedd digidol, ac i feithrin creadigrwydd a chyflogadwyedd.
• Byddwn yn datblygu partneriaethau newydd i feithrin sgiliau, arloesedd ac ymchwil.
• Byddwn yn darparu arddangosfeydd dychmygus a chyfleoedd creadigol i wirfoddoli, i gyfranogi ac i fwynhau’r ddarpariaeth.

Datblygu, Newid, Gwella

• Byddwn yn hyrwyddo gwelliannau sy’n rhoi lle canolog i’r defnyddiwr, ac sy’n llywio’n cysylltiadau gyda chymunedau a gyda chynulleidfaoedd digidol.
• Byddwn yn cyflwyno Rhaglen Newid ac Adnewyddu sy’n hyrwyddo diwylliant uchelgeisiol a mentrus gan roi blaenoriaeth i lesiant, sgiliau a hyblygrwydd y gweithlu.
• Byddwn yn cynnal y sylfaen gyllidol gref drwy reolaeth ariannol effeithiol a thrwy ddatblygu amrywiaeth o weithgareddau cynhyrchu incwm.
• Byddwn yn parhau i fuddsoddi mewn cynlluniau datgarboneiddio a sero net gan fanteisio ar bob cyfle i hyrwyddo datblygiad cynaliadwy.