Dechreuwyd y calendar hwn o ganlyniad i Gynllun Gweithredu Gwrth-hiliol Cymru.
Mae'n nodi digwyddiadau crefyddol, diwylliannol, ymwybyddiaeth, amrywiaeth, coffa a gwyliau banc. Mae’r digwyddiadau yn y calendar yn cysylltu ac yn arddangos yr eitemau amrywiol yng nghasgliad gwych y Llyfrgell.
Mae Sikhiaid yn dathlu urddo'r teitl Guru ar Sri Guru Granth Sahib Ji (testun cysegredig awdurdodol Sikhaeth) ar y diwrnod hwn, a elwir yn Geni'r Guru Granth.
Dethlir Diwrnod Rhyngwladol Elusengarwch ar y diwrnod yma i goffau marwolaeth y fam Teresa o Calcutta a dderbyniodd y Wobr Heddwch Nobel yn 1979, ac i annog cyfrifoldeb cymdeithasol, megis rhoi a gwirfoddoli.
Neilltuir Diwrnod Atal Hunanladdiad y Byd i godi ymwybyddiaeth o achos hunanladdiad ac i hyrwyddo camau i’w atal.
Mae Owain Glyndŵr yn arwr cenedlaethol Cymreig a Thywysog brodorol olaf Cymru. Dethlir y diwrnod i goffau ei etifeddiaeth a'i arweiniad a roddodd lais i bobl Cymru.
Yom Kippur yw'r diwrnod mwyaf sanctaidd mewn Iddewiaeth a Samariadaeth. Mae'n ddydd o ofyn am edifeirwch a chymod ynghyd â gweddïau, ympryd ac elusen. Mae'n nodi diwedd dyddiau uchel sanctaidd yr Iddewon.
Cynhelir Diwrnod Rhyngwladol Heddwch i gofio ac i annog y delfryd o heddwch mewn byd heb ryfel a thrais.
Dethlir Diwrnod Alzheimer y Byd i godi ymwybyddiaeth, addysgu ac annog cefnogaeth i bobl â chlefyd Alzheimer, eu teuluoedd a’u gofalwyr.
Dethlir Gŵyl Canol yr Hydref ar y 15fed diwrnod o 8fed mis calendr lleuad Tsieineaidd i nodi tymor y cynhaeaf mewn diwylliant Tsieineaidd. Mae'n un o'r gwyliau pwysicaf yn niwylliant Tsieina gyda hanes sy'n rhychwantu dros 3,000 o flynyddoedd. Yn ystod yr ŵyl, mae llusernau sy'n symbol o ffyniant a ffortiwn da yn cael eu harddangos, ac yn draddodiadol mae cacennau lleuad yn cael eu bwyta gyda theulu a ffrindiau. Mae'r ŵyl yn seiliedig ar chwedl Chang'e, duwies y Lleuad ym mytholeg Tsieineaidd.
Cynhelir Diwrnod Ieithoedd Ewrop er mwyn hybu ymwybyddiaeth fyd-eang o bwysigrwydd dysgu ieithoedd a gwarchod traddodiadau ieithyddol.