Calendr Cymru a'r Byd

Mae Eisteddfod Gerddorol Ryngwladol Llangollen yn ŵyl gerddorol flynyddol a gynhelir yn Llangollen, yng ngogledd Cymru yn ystod ail wythnos mis Gorffennaf. Mae'n un o nifer o Eisteddfodau mawr blynyddol Cymru. Gwahoddir cantorion a dawnswyr o bob rhan o’r byd i gymryd rhan mewn dros ugain o gystadlaethau, gyda chyngerdd i ddilyn ar ddiwedd y dydd. Mae’r perfformwyr enwog i ymddangos yn Llangollen yn cynnwys Luciano Pavarotti.

Cynhelir Diwrnod Poblogaeth y Byd i godi ymwybyddiaeth o’r materion amrywiol sy’n gysylltiedig â phoblogaeth megis pwysigrwydd cynllunio teulu, iechyd mamau, tlodi a hawliau dynol. Fe'i sefydlwyd gan y Cenhedloedd Unedig yn dilyn y diddordeb aruthrol oedd gan bobl yn Niwrnod Pum Biliwn yn 1987.

Mae Diwrnod Rhyngwladol Nelson Mandela yn ddiwrnod rhyngwladol blynyddol i anrhydeddu Nelson Rolihlahla Mandela, ymgyrchydd a gwleidydd gwrth-apartheid o Dde Affrica. Mae'n cael ei ddathlu mewn gwerthfawrogiad o'r 67 mlynedd y treuliodd Nelson Mandela yn ymladd dros gyfiawnder, cydraddoldeb a hawliau dynol i bawb.

Gŵyl gerddorol flynyddol Geltaidd a rhyngwladol a gynhelir yn nhref Dolgellau yng Nghymru yw Sesiwn Fawr Dolgellau. Sefydlwyd y digwyddiad yn 1992, ac yn y blynyddoedd cynnar fe’i cynhaliwyd yn strydoedd y dref cyn symud i’r Marian Mawr am gyfnod. Erbyn hyn mae’n ôl yng nghanol y dre, ac yn troi strydoedd Dolgellau yn faes gŵyl werin fywiog, gyda cherddoriaeth, llên, comedi a gweithgareddau i blant yn cael eu llwyfannu ar draws amrywiol leoliadau.

Mae Cymdeithas Amaethyddol Frenhinol Cymru wedi chwarae rhan flaenllaw yn natblygiad amaethyddiaeth a’r economi wledig yng Nghymru ers dros ganrif. Cynhelir Sioe Amaethyddol Frenhinol Cymru gan y gymdeithas gyda phedwar diwrnod o gystadlaethau da byw a cheffylau ac amrywiaeth o weithgareddau sydd o ddiddordeb i bawb.

Ganwyd Haile Selassie I ar 23 Gorffennaf, 1892, a bu’n ymerawdwr Ethiopia o 1930 i 1974. Mae’n fawr ei barch gan nifer o Rastafari, ac mae ei ben-blwydd yn un o'r dathliadau arwyddocaol yng nghymunedau Rastafari.

Dethlir Wythnos Bwydo ar y Fron y Byd i goffáu Datganiad Innocenti Awst 1990 a lofnodwyd gan swyddogion y llywodraeth, WHO, UNICEF a sefydliadau eraill i annog, amddiffyn a chefnogi bwydo ar y fron, yn ogystal ag iechyd cyffredinol mamau a'u babanod.

Mae Tisha B'Av yn ddiwrnod ympryd blynyddol mewn Iddewiaeth, ac mae'n cael ei ystyried fel y diwrnod tristaf yn y calendr Iddewig. Fe'i defnyddir i gofio’r holl drychinebau sydd wedi digwydd i'r bobl Iddewig fel yr holocost a dinistr teml Solomon. Mae'n cael ei ystyried yn ddiwrnod o alaru.

Eisteddfod Genedlaethol Cymru yw'r fwyaf o'r eisteddfodau niferus a gynhelir yng Nghymru’n flynyddol. Ystyrir hi fel yr ŵyl gerddoriaeth a barddoniaeth fwyaf yn Ewrop gyda thua 150,000 o ymwelwyr a thros 250 o stondinau masnach. Mae'r ŵyl yn teithio bob yn ail rhwng gogledd a de Cymru. Mae’n ddilysnod i ddathlu celf, iaith a diwylliant Cymru sy’n dyddio’n ôl i 1176.

Cynhelir Diwrnod Rhyngwladol Pobl Gynhenid y Byd yn flynyddol i ddeffro ymwybyddiaeth, amddiffyn hawliau ac amgylchedd cymunedau brodorol ledled y byd. Yn ôl y cenehedloedd unedig, mae 476 miliwn o bobloedd brodorol yn y byd yn byw ar draws 90 o wledydd.