Dechreuwyd y calendar hwn o ganlyniad i Gynllun Gweithredu Gwrth-hiliol Cymru.
Mae'n nodi digwyddiadau crefyddol, diwylliannol, ymwybyddiaeth, amrywiaeth, coffa a gwyliau banc. Mae’r digwyddiadau yn y calendar yn cysylltu ac yn arddangos yr eitemau amrywiol yng nghasgliad gwych y Llyfrgell.
Mae mis Balchder wedi'i neilltuo i ddathlu a choffáu'r LHDTC+. Dechreuodd ar ôl terfysgoedd Stonewall ym 1969 yn America. Yn y mis hwn cynhelir gorymdeithiau, cyngherddau a digwyddiadau amrywiol i godi ymwybyddiaeth am hawliau cyfartal a chyfiawnder pobl sy'n uniaethu fel LHDTC+.
Gelwir Gŵyl Corpws Christi hefyd yn Ddifrifoldeb Corff a Gwaed Sancteiddiolaf Crist. Mae'n un o wyliau Eglwysi Uniongred, Lwtheraidd, Anglicanaidd a Lladin y Gorllewin a ddethlir er parch i ddwyfoldeb a phresenoldeb Iesu yn y Cymun sanctaidd.
Mae Diwrnod Amgylchedd y Byd yn cael ei ddathlu'n flynyddol i godi ymwybyddiaeth a hyrwyddo cymryd camau cynaliadwy ar gyfer diogelu'r amgylchedd. Mae'n cael ei ddathlu gan nifer o lywodraethau a sefydliadau anllywodraethol fel ei gilydd.
Mae merthyrdod Guru Arjan Dev Sahib, sef dathliad o'i fywyd a'r aberth a wnaeth dros y Sikhiaid yn cael ei nodi'n flynyddol. Mae'r dathliadau yn cynnwys darllen llyfr sanctaidd y Sikhiaid, mynd ar orymdeithiau, rhannu melysion.
Sefydlwyd Diwrnod Ffoaduriaid y Byd ar 20 Mehefin 2001, fel ffordd o dalu teyrnged i Gonfensiwn 1951 yn Ymwneud â Statws Ffoaduriaid. Fe'i trefnwyd gan y Cenhedloedd Unedig, gyda'r bwriad o ddathlu ffoaduriaid ledled y byd.
Mae Eisteddfod Gerddorol Ryngwladol Llangollen yn ŵyl gerddorol flynyddol a gynhelir yn Llangollen, yng ngogledd Cymru yn ystod ail wythnos mis Gorffennaf. Mae'n un o nifer o Eisteddfodau mawr blynyddol Cymru. Gwahoddir cantorion a dawnswyr o bob rhan o’r byd i gymryd rhan mewn dros ugain o gystadlaethau, gyda chyngerdd i ddilyn ar ddiwedd y dydd. Mae’r perfformwyr enwog i ymddangos yn Llangollen yn cynnwys Luciano Pavarotti.
Cynhelir Diwrnod Poblogaeth y Byd i godi ymwybyddiaeth o’r materion amrywiol sy’n gysylltiedig â phoblogaeth megis pwysigrwydd cynllunio teulu, iechyd mamau, tlodi a hawliau dynol. Fe'i sefydlwyd gan y Cenhedloedd Unedig yn dilyn y diddordeb aruthrol oedd gan bobl yn Niwrnod Pum Biliwn yn 1987.
Mae Diwrnod Rhyngwladol Nelson Mandela yn ddiwrnod rhyngwladol blynyddol i anrhydeddu Nelson Rolihlahla Mandela, ymgyrchydd a gwleidydd gwrth-apartheid o Dde Affrica. Mae'n cael ei ddathlu mewn gwerthfawrogiad o'r 67 mlynedd y treuliodd Nelson Mandela yn ymladd dros gyfiawnder, cydraddoldeb a hawliau dynol i bawb.
Mae Cymdeithas Amaethyddol Frenhinol Cymru wedi chwarae rhan flaenllaw yn natblygiad amaethyddiaeth a’r economi wledig yng Nghymru ers dros ganrif. Cynhelir Sioe Amaethyddol Frenhinol Cymru gan y gymdeithas gyda phedwar diwrnod o gystadlaethau da byw a cheffylau ac amrywiaeth o weithgareddau sydd o ddiddordeb i bawb.
Mae Tisha B'Av yn ddiwrnod ympryd blynyddol mewn Iddewiaeth, ac mae'n cael ei ystyried fel y diwrnod tristaf yn y calendr Iddewig. Fe'i defnyddir i gofio’r holl drychinebau sydd wedi digwydd i'r bobl Iddewig fel yr holocost a dinistr teml Solomon. Mae'n cael ei ystyried yn ddiwrnod o alaru.