Beth sydd ar gael?

Gwefan yw Gwylio a Gwrando sy'n rhoi mynediad at gasgliadau o ffilm, fideo a sain wedi'u digido o Archif Sgrin a Sain Llyfrgell Genedlaethol Cymru ac Archif Ddarlledu Cymru. 

Beth sydd ar gael ar Gwylio a Gwrando?  

Mae Gwylio a Gwrando yn dwyn ynghyd ddeunydd clyweledol amrywiol Llyfrgell Genedlaethol Cymru. Mae'r deunydd yn cynnwys:

• Ffilm a fideo: mae ein casgliadau ffilm a fideo’n cynnwys rhai enghreifftiau cynharaf y cyfrwng o ddiwedd y19eg ganrif, hyd at waith cynnar gan rhai o fawrion yr 21ain ganrif.
• Casgliad Oddi-ar-yr-Awyr: ers dros pedwar degawd, mae’r Archif Sgrin a Sain wedi bod yn recordio rhaglenni sydd â chysylltiad i Gymru oddi ar ddarllediadau teledu drwy gytundeb arbennig gyda’r darlledwyr. Yn ogystal â’r rhaglenni, mae hefyd ciplun o’r cyfnod drwy hysbysebion ac idents.  
• Archif Ddarlledu Cymru: deunydd o gasgliadau BBC Cymru Wales, ITV Cymru Wales ac S4C, o raglenni llawn i glipiau amrwd cyn eu golygu. Mae'r rhain yn gallu cynnig dipyn o gip tu ôl i len y diwydiant, gan gynnwys sgriniau ‘count-in' a ‘tones and bars’ hefyd.
• Rhaglenni radio: mae nifer fawr o raglenni radio sy’n rhoi sylw i Gymru, ei phobl, a’i hiaith o orsafoedd ar draws rwydweithiau darlledu Prydeinig.  

Wrth i fwy o ddeunydd cael ei ddigido, bydd y casgliadau sydd ar gael drwy wefan Gwylio a Gwrando’n cynyddu.

Datblygwyd Gwylio a Gwrando'n wreiddiol fel rhan o brosiect Archif Ddarlledu Cymru er mwyn darparu adnodd di-dâl arlein sy'n darparu mynediad at gasgliadau clyweledol unigryw ac hanesyddol Llyfrgell Genedlaethol Cymru.