Dechreuwyd y calendar hwn o ganlyniad i Gynllun Gweithredu Gwrth-hiliol Cymru.
Mae'n nodi digwyddiadau crefyddol, diwylliannol, ymwybyddiaeth, amrywiaeth, coffa a gwyliau banc. Mae’r digwyddiadau yn y calendar yn cysylltu ac yn arddangos yr eitemau amrywiol yng nghasgliad gwych y Llyfrgell.
Mae Diwrnod Rhyngwladol y Gweithwyr ,a elwir hefyd yn Ddiwrnod Llafur, yn cael ei ddathlu'n flynyddol ar y diwrnod hwn. Mae'n coffáu cyfraniadau a brwydrau'r dosbarth gweithiol. Defnyddir y diwrnod hwn hefyd i godi ymwybyddiaeth o faterion sy'n ymwneud â gwaith megis iechyd a diogelwch, cyflogau teg ac amgylchedd gwaith ffafriol.
Mae Diwrnod y Groes Goch/Cilgant Coch y Byd yn ddathliad blynyddol i anrhydeddu'r sefydliad a'i gyfraniadau dyngarol yn fyd-eang. Mae hefyd er anrhydedd i'w sylfaenydd, Jean-Henri Dunant, a aned ar y diwrnod hwn yn 1828.
Mae Diwrnod Rhyngwladol y Teuluoedd yn cael ei gynnal ar y diwrnod hwn yn flynyddol. Wedi’i gyhoeddi gyntaf gan gynulliad cyffredinol y Cenhedloedd Unedig ym 1993, mae’n ymdrechu i fyfyrio ar a chodi ymwybyddiaeth o bwysigrwydd teulu fel sylfaen cymdeithas.
Mae Diwrnod Amrywiaeth Ddiwylliannol y Byd ar gyfer Deialog a Datblygiad yn cael ei nodi i ddathlu amrywiaeth a chodi ymwybyddiaeth o faterion hiliaeth a gwahaniaethu. Cafodd ei gymeradwyo gan y Cenhedloedd Unedig yn 2002.
Mae mis Balchder wedi'i neilltuo i ddathlu a choffáu'r LHDTC+. Dechreuodd ar ôl terfysgoedd Stonewall ym 1969 yn America. Yn y mis hwn cynhelir gorymdeithiau, cyngherddau a digwyddiadau amrywiol i godi ymwybyddiaeth am hawliau cyfartal a chyfiawnder pobl sy'n uniaethu fel LHDTC+.
Mae Diwrnod Amgylchedd y Byd yn cael ei ddathlu'n flynyddol i godi ymwybyddiaeth a hyrwyddo cymryd camau cynaliadwy ar gyfer diogelu'r amgylchedd. Mae'n cael ei ddathlu gan nifer o lywodraethau a sefydliadau anllywodraethol fel ei gilydd.
Sefydlwyd Diwrnod Ffoaduriaid y Byd ar 20 Mehefin 2001, fel ffordd o dalu teyrnged i Gonfensiwn 1951 yn Ymwneud â Statws Ffoaduriaid. Fe'i trefnwyd gan y Cenhedloedd Unedig, gyda'r bwriad o ddathlu ffoaduriaid ledled y byd.
Cynhelir Diwrnod Poblogaeth y Byd i godi ymwybyddiaeth o’r materion amrywiol sy’n gysylltiedig â phoblogaeth megis pwysigrwydd cynllunio teulu, iechyd mamau, tlodi a hawliau dynol. Fe'i sefydlwyd gan y Cenhedloedd Unedig yn dilyn y diddordeb aruthrol oedd gan bobl yn Niwrnod Pum Biliwn yn 1987.
Mae Diwrnod Rhyngwladol Nelson Mandela yn ddiwrnod rhyngwladol blynyddol i anrhydeddu Nelson Rolihlahla Mandela, ymgyrchydd a gwleidydd gwrth-apartheid o Dde Affrica. Mae'n cael ei ddathlu mewn gwerthfawrogiad o'r 67 mlynedd y treuliodd Nelson Mandela yn ymladd dros gyfiawnder, cydraddoldeb a hawliau dynol i bawb.
Dethlir Wythnos Bwydo ar y Fron y Byd i goffáu Datganiad Innocenti Awst 1990 a lofnodwyd gan swyddogion y llywodraeth, WHO, UNICEF a sefydliadau eraill i annog, amddiffyn a chefnogi bwydo ar y fron, yn ogystal ag iechyd cyffredinol mamau a'u babanod.