Heddiw yn dilyn pleidlais unfrydol, cyhoeddwyd bod Llyfrgell Genedlaethol Cymru wedi cael ei dderbyn fel aelod o The Conference of European National Librarians (CENL).
Dyma'r tro cyntaf i'r Llyfrgell ddod yn aelod o'r rhwydwaith nodedig hwn.
Bydd yr aelodaeth yn darparu llwyfan i Lyfrgell Genedlaethol Cymru gydweithio’n agos gyda llyfrgelloedd cenedlaethol eraill, gan helpu i lunio’r ffordd y caiff casgliadau Ewrop eu cadw a’u gwneud yn hygyrch. Bydd hefyd yn chwarae rhan annatod o gyflawni strategaeth 2025–2030 y Llyfrgell o gysylltu Cymru a’r Byd.
Yn ôl Prif Weithredwr y Llyfrgell, Rhodri Llwyd Morgan:
“Rwy'n falch iawn fod Llyfrgell Genedlaethol Cymru wedi ei derbyn yn aelod o'r rhwydwaith rhyngwladol nodedig yma. Mae'r Llyfrgell yn ymfalchïo yn y gwaith mae'n ei wneud drwy fod yn rhan o rwydweithiau a mentrau rhyngwladol. Bydd CENL yn cryfhau proffil Cymru yn y meysydd diwylliannol, treftadaeth, data ac arloesedd. Thema bwysig yn y cyfarfod eleni yn Luxembourg oedd hybu cydweithio yn y meysydd seibr-ddiogelwch a gwarchod asedau digidol arwyddocaol ac unigryw er mwyn iddynt fod ar gael i bobl Cymru ar gyfer cenedlaethau'r dyfodol.”
Mae CENL yn rhwydwaith o lyfrgelloedd cenedlaethol o bob rhan o Ewrop, sydd yn cydweithio i warchod a hyrwyddo treftadaeth ddiwylliannol a deallusol y cyfandir, tra’n cefnogi cydweithio, cyfnewid gwybodaeth a datblygiad proffesiynol.
Categori: Newyddion