Edward Lhuyd
Ganed Edward Lhuyd ym 1660 ac fe'i haddysgwyd yn Ysgol Ramadeg Croesoswallt cyn iddo fynd i astudio'r gyfraith yng Ngholeg Iesu, Rhydychen ym 1682. Roedd gan Lhuyd ddiddordeb mawr mewn hynafiaethau, llysieueg a daeareg ac yn fuan iawn ar ôl mynd i'r Coleg fe drodd ei sylw at y gwaith gwyddonol arbrofol a wnaed yn Amgueddfa Ashmole, Rhydychen. Gadawodd y coleg cyn graddio ac fe benodwyd ef yn un o is-geidwaid yr Amgueddfa ym 1687 ac yna'n geidwad ym 1691.
Yn 1707, cyhoeddodd Lhuyd gyfrol gyntaf ei 'Archaeologia Britannica: an Account of the Languages, Histories and Customs of Great Britain, from Travels through Wales, Cornwall, Bas-Bretagne, Ireland and Scotland'.
Ei fwriad oedd i gynnwys Geirlyer Kyrnẁeig yn y darpar ail gyfrol o'i waith, ac mi gyhoeddodd y bwriad hwn yn y gyfrol gyntaf (t. 253):
"I find first that I must recal the promise made of a Cornish-English Vocabulary. I have one by me, written about six years since, and have lately improv’d it whith what additions I could; But there being no room for it in this volume…it must be deferred to the next."
Yn anffodus, bu farw Lhuyd yn sydyn yn 1709 cyn iddo gael y cyfle i baratoi ei ail gyfrol i'r wasg.