Dechreuwyd y calendar hwn o ganlyniad i Gynllun Gweithredu Gwrth-hiliol Cymru.
Mae'n nodi digwyddiadau crefyddol, diwylliannol, ymwybyddiaeth, amrywiaeth, coffa a gwyliau banc. Mae’r digwyddiadau yn y calendar yn cysylltu ac yn arddangos yr eitemau amrywiol yng nghasgliad gwych y Llyfrgell.
Mae mis Balchder wedi'i neilltuo i ddathlu a choffáu'r LHDTC+. Dechreuodd ar ôl terfysgoedd Stonewall ym 1969 yn America. Yn y mis hwn cynhelir gorymdeithiau, cyngherddau a digwyddiadau amrywiol i godi ymwybyddiaeth am hawliau cyfartal a chyfiawnder pobl sy'n uniaethu fel LHDTC+.
Sefydlwyd Diwrnod Ffoaduriaid y Byd ar 20 Mehefin 2001, fel ffordd o dalu teyrnged i Gonfensiwn 1951 yn Ymwneud â Statws Ffoaduriaid. Fe'i trefnwyd gan y Cenhedloedd Unedig, gyda'r bwriad o ddathlu ffoaduriaid ledled y byd.
Mae Diwrnod Windrush yn cael ei goffáu yn y Deyrnas Unedig ar 22 Mehefin bob blwyddyn i anrhydeddu’r ymfudwyr a gyfrannodd at yr economi ar ôl yr Ail Ryfel Byd. Mae'r diwrnod hwn yn dathlu dyfodiad 1,027 o bobl o'r Caribî ar yr HMT Empire Windrush yn 1948.
Mae Eisteddfod Gerddorol Ryngwladol Llangollen yn ŵyl gerddorol flynyddol a gynhelir yn Llangollen, yng ngogledd Cymru yn ystod ail wythnos mis Gorffennaf. Mae'n un o nifer o Eisteddfodau mawr blynyddol Cymru. Gwahoddir cantorion a dawnswyr o bob rhan o’r byd i gymryd rhan mewn dros ugain o gystadlaethau, gyda chyngerdd i ddilyn ar ddiwedd y dydd. Mae’r perfformwyr enwog i ymddangos yn Llangollen yn cynnwys Luciano Pavarotti.
Cynhelir Diwrnod Poblogaeth y Byd i godi ymwybyddiaeth o’r materion amrywiol sy’n gysylltiedig â phoblogaeth megis pwysigrwydd cynllunio teulu, iechyd mamau, tlodi a hawliau dynol. Fe'i sefydlwyd gan y Cenhedloedd Unedig yn dilyn y diddordeb aruthrol oedd gan bobl yn Niwrnod Pum Biliwn yn 1987.
Mae Diwrnod Rhyngwladol Nelson Mandela yn ddiwrnod rhyngwladol blynyddol i anrhydeddu Nelson Rolihlahla Mandela, ymgyrchydd a gwleidydd gwrth-apartheid o Dde Affrica. Mae'n cael ei ddathlu mewn gwerthfawrogiad o'r 67 mlynedd y treuliodd Nelson Mandela yn ymladd dros gyfiawnder, cydraddoldeb a hawliau dynol i bawb.
Gŵyl gerddorol flynyddol Geltaidd a rhyngwladol a gynhelir yn nhref Dolgellau yng Nghymru yw Sesiwn Fawr Dolgellau. Sefydlwyd y digwyddiad yn 1992, ac yn y blynyddoedd cynnar fe’i cynhaliwyd yn strydoedd y dref cyn symud i’r Marian Mawr am gyfnod. Erbyn hyn mae’n ôl yng nghanol y dre, ac yn troi strydoedd Dolgellau yn faes gŵyl werin fywiog, gyda cherddoriaeth, llên, comedi a gweithgareddau i blant yn cael eu llwyfannu ar draws amrywiol leoliadau.
Eisteddfod Genedlaethol Cymru yw'r fwyaf o'r eisteddfodau niferus a gynhelir yng Nghymru’n flynyddol. Ystyrir hi fel yr ŵyl gerddoriaeth a barddoniaeth fwyaf yn Ewrop gyda thua 150,000 o ymwelwyr a thros 250 o stondinau masnach. Mae'r ŵyl yn teithio bob yn ail rhwng gogledd a de Cymru. Mae’n ddilysnod i ddathlu celf, iaith a diwylliant Cymru sy’n dyddio’n ôl i 1176.
Cynhelir Diwrnod Rhyngwladol Pobl Gynhenid y Byd yn flynyddol i ddeffro ymwybyddiaeth, amddiffyn hawliau ac amgylchedd cymunedau brodorol ledled y byd. Yn ôl y cenehedloedd unedig, mae 476 miliwn o bobloedd brodorol yn y byd yn byw ar draws 90 o wledydd.
Mae Diwrnod Rhyngwladol Coffáu Dioddefwyr Deddfau Trais yn Seiliedig ar Grefydd neu Gred yn ddiwrnod ymwybyddiaeth blynyddol a noddir gan y Cenhedloedd Unedig i godi llais yn erbyn rhagfarn grefyddol ac erledigaeth yn fyd-eang.